2015年10月20日 星期二

有關我第一個紋身



由於實在有很多人問,而我都唔知點樣簡短答佢,所以係到寫一次,比自己釐清下思緒,同時睇完的人唔好再問了哈哈哈。

呢個紋身就係呢個鏡頭既簡化版,但呢個鏡頭對我卻意義重大。

那年是2012年,我跟我前女朋友,在朗豪坊頂層的咖啡店裡,買了一杯咖啡,拿手提電腦出來坐著看戲。

而且看到頭暈眼花,一頭霧水。
有睇過既人,第一次睇完應該同我有類似感覺。

但呢套戲,開啓左我思索之門。
電影過後,我跟前女友不停搵有關解讀,有關分析。
先理解超脫既概念。(電影結局表達既嘢,就係類似呢樣嘢。)
我同前女友從電影,講到成佛,講到宗教,講到存在,神明,又返返電影。
係一場討論風暴後,我地又會再搵多套電影,再睇。
睇電影呢樣嘢,就係由我前度教識我的。
思索哲學問題,都係呢到黎。

呢一個鏡頭,呢一個日出,啟蒙左我。Enlightenment。

講返呢張圖(呢個紋身當然唔止咁簡單)
講返呢套電影。係Stanley Kubrick既大作 2001: A Space Odyssey
當中用左好多呢個圖案所組成既視點,叫做:one-point perspective。
呢個係佢既特色,佢大部份戲都有用到呢個手法。
但呢個視點,你將佢組成一個三角形咁睇,覺唔覺好似望住一對路軌,無限延伸咁。

無錯,就係無限既象徵。

佢既電影有唔少位都係象徵無限,或深不可測,或潛能既隱喻。
例如Shinning個陣,放Jack係中間,象徵佢腦裡個種無限既、無底既惡念正在成長。
我記得有片睇,有興趣既人,google one-point perspective 同 Stanley Kubrick應該就搵到。

咁係呢張日出圖,當中既無限係乜嘢?
呢點又要講返2001,同尼采既關係。(相信有睇開既人都知係咩了)

正正係呢個opening,係呢個日出既畫面,
電影當時播既歌,係叫做 Also Sprach Zarathustra ,請睇片:
https://www.youtube.com/watch?v=e-QFj59PON4

《查拉圖斯特拉如是說》
就係呢首歌既中文名,亦都係尼采既一大著作。
(實在有好多人問過我邊個係尼采,我無好認真研究,但簡略d講佢係德國詩人同哲學家。兩大思想:人進化成超人;永恆回歸。我(慚愧d講)未睇哂《查拉圖斯特拉如是說》(但就快)所以講唔到太多。班門弄斧。)
係呢本著作入面,第一章,就係日出。
引文(不知是誰的譯本但字句是岩的)如下:

在查拉圖斯特拉三十歲時,離開了家鄉和家鄉的湖,走進群山之中。在那裡他享受著他的靈魂和孤獨,十年不倦。但是,最後他的內心轉變了——一天早晨,與玫瑰色的黎明一同起來,他迎著太陽,對它如是說:

你,偉大的星辰啊!假如沒有你所照耀的人們,你的幸福會是什麼?

由於第一章好長,所以簡短講就係查拉圖斯特拉學太陽,要下降到人間,將佢所得既智慧去布教(其實係尼采既智慧,應叫《尼采如是說》)

咁樣呼之欲出,2001既開頭係一個日出,播既歌係《查拉圖斯特拉如是說》,本書第一章又係日出。好喇,似喇,跟住呢?

《查拉圖斯特拉如是說》提出在尼采其中一大思想,就係人類既未來。
人類點解由人猿,停止左進化?
係乜嘢令人類,去唔到再上一層?
再上一層係咩?

尼采既見解,人類再進化,係超人。
Übermensch
個超人唔係電影個d,
而係一個可以超越到人類自身限制既超然物(唔係梁振英
當中可以係講緊,社會道德層,追求終極,完美主義既人。
係品行、成就,甚至體格上,都係頂尖。超人。
呢d超人,可能甚至係凡人眼中,係同社會脫節,佢地會獨居,追求精神超然,
務求超越到人類既限制。
其實同佛差唔多?悟道,然後涅槃。

涅槃呢下,就係超人另一個解讀,亦都係我有既解讀。
就係人再進化,就係超自然既存在,精神存在。
可以棄除肉身規限,讓靈魂可以係宇宙飛翔,不受時空所限既精神純粹體。
呢個境界,正正就係2001電影主角係電影尾段變成既存在。
佢不受肉身限制,進化左成可以在宇宙俯瞰地球既小孩。

點解係小孩?
又係尼采,尼采講過成為超人有幾個階段:
要成為駱駝,可承受世俗眼光指罵而不倒既堅持;
要成為獅子,對於頂點同完美既追求既勇猛,甚至暴戾;
最後,要回歸成為小孩,有既,係一顆純粹既心,純粹為成為超人而存在既心。
所以電影以開頭既日出鏡頭同音樂超首,將主角超脫,然後轉之為小孩,來比喻尼采既思想。

而呢個,亦都係我所追求既,嘢。
唔係講到我想超脫成仙,即使要做,憑我既道行還得輪迴多百多千多次人生。
但講到人類既未來,我係確信人類有超然既潛能(包括梁振英),有將靈魂覺醒既能力。
呢個係我既終極目標。

但講返作為人類既存在,超人既思想都係教我,點樣做個更好既人。
對人更好,對事更好,對自己更好。對世事都有要求,要求更好。
要求其他人都可以成為超人。
至少,有呢個信念。
頂點既追求。
超然既存在。

就係呢個紋身既意思。

當然到最後,呢個紋身都係獻比啟發我既兩個人,Stanley Kubrick,以及同一齊成長既前度。
紋係呢個位,就係想自己一生人,每次一舉起左前臂,作睇錶狀,
都會提自己:要超脫成為超人;要有對哲學既熱衷;要有對電影既熱衷;要有懂得欣賞美學、音樂既機會;不可忘記啟發自己既人。

因為呢一套戲,實在將我對整個世界既睇法都徹底扭轉,改變左我一生
所以,係值得紋既圖案。

多謝你睇哂成篇嘢,希望你下次見到我個紋身,就唔洗再問佢代表d咩,因為一時三刻我點講哂比你知,求其講又有違我應將你步入超人之路既原則。

最後講返句,紋身係一生既決定,所以紋之前真係要諗清諗楚。

沒有留言:

張貼留言